బ్రహ్మ కడిగిన పాదము

రచన: శ్రీ అన్నమాచార్యులు
రాగం: ముఖారి
తాళం: ఆది

పల్లవి:
బ్రహ్మ కడిగిన పాదము
బ్రహ్మము తానె నీ పాదము ॥ బ్రహ్మ ॥

చరణములు:
చెలగి వసుధ గొలిచిన నీ పాదము
బలి తల మోపిన పాదము
తలఁకక గగనము దన్నిన పాదము
బలరిపుఁ గాచిన పాదము ॥ 1 ॥

కామిని పాపము గడిగిన పాదము
పాము తల నిడిన పాదము
ప్రేమపు శ్రీసతి పిసికెడి పాదము
పామిడి తురగపుఁ పాదము ॥ 2 ॥

పరమ యోగులకు బరిపరి విధముల
వరమొసఁగెడి నీ పాదము
తిరువేంకటగిరి తిరమని చూపిన
పరమపదము నీ పాదము ॥ 3 ॥